Í Piemonte á Norður - Ítalíu er Langhe, heimavöllur Maju. Ferskt sveitaloft og stórbrotið landslag með útsýni til Alpanna.
Langhe hérað
Langhe er einn af gimsteinum Piemonte héraðsins og er í Cuneo sýslu. Langhe ásamt Roero og Monferrato komst á heimsminjaskrá UNESCO árið 2014 vegna hinnar sögulegu víngerðarhefðar sem spannar yfir 2000 ár og einstakrar náttúrufegurðar.
Stórbrotið landslag, mótað af samspili náttúru og manns þar sem hæðir, víðáttur og vínviður blasa við eins langt og augað eygir. Ótal litlir og heillandi miðaldabæir blasa við á hæðunum, þar sem tignarlegir kastalar standa reisulegir á toppunum - og í fjarska gnæfa Alparnir sem aðskilja Ítalíu og Frakkland.
Áin Tanaro
Áin Tanaro sem á upptök sín í Lígúríu Ölpunum, við frönsku landamærin, rennur m.a. í gegnum Cuneo og sameinast að lokum ánni Pó. Tanaro hefur mikla þýðingu fyrir landið og söguna á svæðinu. Meðfram farvegi hennar má finna fallega bæi og gróin svæði, sérstaklega í vínhéruðunum Langhe og Roero.
Alba
Í Cuneo sýslu í Langhe héraði er bærinn Alba (ca. 31.000 íbúar), rómaður meðal matarunnenda og er frægur um allan heim fyrir hvítu trufflurnar, sælkeravínið og matinn. Alba er auk þess þekkt fyrir sína mikilfenglegu dómkirkju og önnur gotnesk kennileiti.
Neive
Neive er lítið og heillandi miðaldaþorp í Langhe-héraðinu. Þorpið er þekkt fyrir fallegt útsýni yfir vínekrur, þröngar steinlagðar götur og vel varðveitta sögu. Það var kosið eitt af fallegustu þorpum Ítalíu ("Borghi più belli d'Italia").
Barolo
Miðaldaþorpið Barolo stendur á hæð og er umkringt fallegum vínekrum í allar áttir. Þorpið er nafntogað fyrir hið stórbrotna Barolo-vín, oft kallað „konungur ítalskra vína“, og er unnið úr Nebbiolo-þrúgunni.
Í Barolo finnurðu sögulegar víngerðir, dásamleg veitingahús og ævintýralegt landslag. Castello Falletti-kastalinn gnæfir yfir þorpinu og hýsir vínsafn um sögu Barolo-vínsins. Gönguferð um þröng strætin leiðir þig að fjölmörgum vínsölum og sælkerabúðum þar sem þú getur smakkað nokkur af bestu vínum svæðisins.
Barolo er staður fyrir sælkera, vínsérfræðinga og alla sem vilja upplifa ekta og ósvikna ítalska fegurð.
